Katarakta (mirvari suyu) əməliyyatı

Katarakta əməliyyatında gözün bulanmış təbii linzası — büllur — xaric edilir və yerinə süni büllur (intraokulyar linza) qoyulur. Əməliyyat təxminən 10–15 dəqiqə çəkir: buynuz qişada təxminən 2 millimetrlik kəsik açılır, bəbək genəldilmiş vəziyyətdə bulanmış büllur xaric edilir, qatlanmış linza gözün içinə yeridilir və orada açılır. Sağalma bir neçə gün çəkir və böyük reabilitasiya tələb etmir.

Əməliyyat hansı üsulla aparılır?

Filialda katarakta əməliyyatları fakoemulsifikasiya (fako) üsulu ilə, tikişsiz aparılır. Fakoemulsifikasiyada bulanmış büllurun nüvəsi ultrasəs enerjisi ilə xırdalanaraq kiçik kəsikdən xaric edilir, onun yerinə isə qatlanmış süni büllur yerləşdirilir. Əməliyyat ağrısız aparılır.

Əməliyyat nə vaxt lazımdır?

Katarakta dərmanla müalicə olunmur: bulanmış büllurun yeganə müalicəsi əməliyyatdır. Əməliyyatın vaxtı görmənin gündəlik həyata — oxumağa, maşın sürməyə, işə — təsirinə və müayinənin nəticələrinə görə həkimlə birlikdə müəyyən edilir. Görmənin dumanlanmasını yaşlılığın qaçılmaz nəticəsi hesab edib müayinəni təxirə salmayın.

Əməliyyatdan əvvəl

Müayinə zamanı görmə itiliyi və gözdaxili təzyiq yoxlanılır, şırım lampası ilə gözün ön hissəsi, göz dibi isə ayrıca qiymətləndirilir. Göz dibini görmək çətin olduqda (məsələn, sıx kataraktada) ultrasəs müayinəsi aparıla bilər. Süni büllurun optik gücü əməliyyatdan əvvəl gözün ölçülərinə əsasən hesablanır.

Əməliyyatdan sonra

Sağalma bir neçə gün çəkir və böyük reabilitasiya tələb etmir. Pasiyent adətən əməliyyat günü evə buraxılır. Həkimin təyin etdiyi damcılardan istifadə qaydasına və nəzarət müayinələrinin vaxtına əməl etmək vacibdir. Nəticə haqqında. Əməliyyatdan sonra görmənin nə dərəcədə yaxşılaşacağı torlu qişanın, görmə sinirinin və gözün digər strukturlarının vəziyyətindən də asılıdır. Bunu həkim müayinədən sonra fərdi olaraq izah edir.

Həkimin bu sahədəki hazırlığı

Dr. Qafar Tağıyev katarakta cərrahiyyəsi üzrə mütəxəssisdir. 2013-cü ildə Hindistanda fakoemulsifikasiya və kiçik kəsikli katarakta cərrahiyyəsi (SICS) üzrə fellowship proqramlarında iştirak edib.