Hormon analizlərinə necə hazırlaşmalı? | Dr. Mədinə Dilbazi

Bu səhifələrdəki istinad dəyərləri ümumi məlumat xarakterlidir. Laboratoriyalar arasında normal aralıqlar fərqlənə bilər; nəticəni həmişə laboratoriyanın göstərdiyi aralıq və həkimin şərhi ilə birlikdə qiymətləndirin.

Ümumi qaydalar

Aclıq: qlükoza, insulin və lipidlər üçün adətən 8–12 saat aclıq (su içmək olar). Vaxt: kortizol, testosteron və bir çox digər hormon üçün səhər saatları; prolaktin üçün səhər, sakit vəziyyətdə, oyandıqdan bir müddət sonra. Aybaşı sikli: FSH, LH, estradiol çox vaxt siklin 2–5-ci günündə; progesteron isə siklin ikinci yarısında (28 günlük sikldə təxminən 21-ci gün) — həkimin göstərişinə görə. Stress və idman: analizdən əvvəlki gün ağır fiziki yükdən, analiz səhəri isə gərginlikdən çəkinmək. Dərmanlar: hormonal kontraseptivlər, steroidlər, tiroid dərmanları, biotin tərkibli əlavələr və digər dərmanlar nəticəyə təsir edə bilər — dayandırmazdan əvvəl mütləq həkimlə məsləhətləşin. Levotiroksin: TSH-ın izlənməsi üçün analiz günü dərmanın qəbul vaxtını həkiminizlə razılaşdırın (çox vaxt qan götürüldükdən sonra içilməsi tövsiyə olunur).